انتخابات بایاتیلاری

باتیبلار کثافته
پالچیغا، مین آفته
ایت، قورد یول کسمک ایچین
دوشوبلار رقابته

---

مش حسن تره وئردی
خلقه بال- کرَه وئردی
ستاد ووردو ، ستاددا
آروادین ارَه وئردی

---

گوموش، قیزیل، مِس اولوب
قودوق ، پِرَنسِس اولوب
گل گؤر ،هر ائششک آدام
دکتر ، مهندس اولوب

---

دئمَه کی اوغرو چوخدور
قارین ، گؤزلری توخدور 
هئچ اولکه دَه، هئچ یئردَه
بیر بئله اوغرو یوخدور

---

بیر ایشچی دیر، داش کَسَر
داشی قورو ، یاش کَسَر
کاندید اولوب بللی دیر
شورا اولسا باش کسَر

---

کاندید اولوب ، رای آلار
میزین دالیندا قالار
شورا اولاندان سورا
ملتی اله سالار

---

گلمَه ییب چاپماق ایچین
ایت کیمین قاپماق ایچین
مش حسن شورا اولوب
تک چؤرک تاپماق ایچین

مش حسن

مش حسن ودکا! ایچیب
شالوارین ترسه بیچیب
قاب - باجایا عکس ووروب
گلمه میش شهره سیچیب

سَنین اولسون

سَنین اولسون دیله ییم

چاییم ، پنیر-چوره ییم

سَندَن دولوب ، آل ساخلا

پارچالانان اوره ییم

سن سیز

یوخدور مَنه ایستَک لی و  همدم سَن سیز
ای یار مَنی هلاک ائدَر غم سَن سیز
گؤز یاشیما، یالوارماغیما رحم ائله ، گل
دونیام اولاجاق زَهَر، جهنّم سَن سیز

سئودان

اوچوب ،باشیمدان گئتمَز

نیسگیلیم سونا یئتمَز

آج قالسام،سوسوز قالسام

سئودان منی ترک ائتمَز