اشعار علیرضارضائی

اشعار فارسی و ترکی علیرضارضائی

اشعار علیرضارضائی

اشعار فارسی و ترکی علیرضارضائی

رباعیات ترکی

سو قاتما سودا،بو ساده خالغا ساتما

تولکو صیفت اولما ، یولوموزدا یاتما

ال چکمه میشیک هله بیز ائششک لیکدَن

ای شیخ یالان دئمه بیزی آلداتما !

یوخدور مَنه ایستَک لی و  همدم سَن سیز
ای یار مَنی هلاک ائدَر غم سَن سیز
گؤز یاشیما، یالوارماغیما رحم ائله ، گل
دونیام اولاجاق زَهَر، جهنّم سَن سیز

دونیادا آجی ، ظلم ، ستم قورتارماز
مجنونلوق و اصلی و کرم قورتارماز
اولمالی دئییل ولی بیرآز شاد یاشا

قورتارمالییق بیزلر و غم قورتارماز

سو، برقه،پولا، اؤزگه یَه محتاج اولسون

گئتسین ایشه اوندان سورا اخراج اولسون
تا چاره سیز، آج میللتی درک ائله سین

آرزو ائدیرم کی شیخ ده آج اولسون

دونیانی گره ک عاقل آدام کم توتسون 
ُسئوگیلی آلیب قوجاغا محکم توتسون 
چوخ بیلمیش آدام جام شرابین بئلینی

محکم توتا قویماز اوره یین غم توتسون

تاثیر یوخو نفس ده بوردا سن سیز
مین عاشق اؤلوب هوس ده بوردا سن سیز
یول باغلی،دومانلی ، لاپ اومودوم اوزولوب
هی آه چکیرم قفس ده بوردا سن سیز

گئت لذّت آپار باهاردا داغدان ،باغدان
ویسکی و  شراب ایچ قدَح، بارداغدان
ای ائششک آدام ! قیزیل دئیل سن، کی سنی
تورپاغا سوخوب چیخاردالار تورپاغدان

get ləzzet apar baharda dağdan,bağdan
Viski və şarabı iç qədəh,bardağdan
ey eşşək adam qizil dəeylsən,ki səni
torpağa sorub,çıkardalar torpağdan

هئچ فیکر ائله مَز،علم و ساوادی چوخدور
یونجاسی،سامانی،هامی زادی چوخدور
بیر کیمسَه دئدی : خطرلی اینسان کیمیدیر ؟ 
او ائششک آدام کی اعتقادی چوخدور
heç fikr eləməz,elm o savadi çoxdur
yoncasi,samani,hamizadi çoxdur
bir kimsə dedi:xətərli insan kimdir?
O eşşək adam ki etiqadi çoxdur

بیر سؤز دئییرَم کی اوندا صحبت یوخدور
جاهیل اولاسان،سن ده فضیلت یوخدور
اؤرگن بو سؤزو، قولاغینا سیرغا ائله
نادانلیغدان بویوک مصیبت یوخدور
bir söz deiyrəm ki onda söhbət yoxdur
cahil olasan,səndə fazilət yoxdur
örgən bu sözü,Qulağina sırğa elə
nadanliğdan büyük müsibət yoxdur

جنّت اورادیر که آه و ماتم یوخدور
ساقیّ و شراب چوخدور و غم یوخدور
باور ائلمَه پوچ و یالان وعده لری
بوردان سورا هئچ یئرده جهنّم یوخدور

cənnət oradır ki ah o matəm yoxdur
saqi o şərab çoxdur o qəm yoxdur 
bavər eləmə puç o yalan vədələri
burdan sora heç yerdə cəhənnəm yoxdur

کوت ائششگی تحصیل دمکرات ائله مَز
هم ائششک آدام ترک خرافات ائله مَز
مدح ائیله مَه ائششگلیغی چون هئچ ائششک
 ائششگلیینه فخر و مباهات ائله مز

سَم توکدو یئمَک، آشیما سَندَن سونرا
خَط چَکدی قلم-قاشیما سَندَن سونرا
کؤهنَه فلکین سینیق- سؤکوک چرخیندَن 
داش یاغدی سینیق باشیما سَندَن سونرا

قلبیم سَنَه،او گؤزلرینَه وورغون دور
سَن سیز بو جهان فایده سیز،دورغون دور
عشق اولماسا بیر تونل کیمین دیر دونیا
قاپ قارا،قارانلیق دی،تِرن یورغون دور

اوغلان،کیشی،آروادی،قیزی سیندیرماز
باشی، اوره یی، قیچی،دیزی سیندیرماز
  دشمنلره دی ثابت اولوب دور دردی
بیز سیندیراریق،درد بیزی سیندماز

سندن سورا یوخ اولدوز،ایشیق قلبیمده
قار،قیش دی،قارانلیق دی قیریق قلبیمده
سن سیز چوخ آغیر دی،زندگانلیق آجی دیر
اود توتموش و قارماقاریشیق قلبیمده

ای بادا گئدیب جلالی صبر ائت صبر ائت
داغ- داش،مئشه نین مارالی صبر  ائت،صبر ائت
مرهم اولاجاق دردلرینه اؤزگورلوک
ای قلبی درین یارالی صبر ائت،صبر ائت

دونیایا اینک کیمین گلیب غاز کئچمَمم
میخانا آچیق اولسا،اورا آز کئچمَم
میخانا،شراب و سازدان،ساقی دان
هر کیمسه منی منع ائله سین واز کئچمَم


ساغلام قوجادان، دوزگون ایگیددن ال چَک
پیس جور قاپی باغلانیب ،کلیددن ال چَک
ایراندی جهنم،یازیلیب تابلوسونا

گلدین بورا هر ایستَک،اومیددن ال چَک

یاریم کی کوسوبدور اللی بش آی منه

هی بوزدو دوداق و وئرمَه دی چای منه !

گؤندرمَه دی قونشولاریمین هئچ بیریسی

بیر ایستی قوجاق و بیر دوداق پای منه

الدَن وئریب عاغلینی،دلی مجنون دور
فرهاد کیمین،کَرَم کیمین وورغون دور
هرکس سنین آماجین اولوب، گؤزلرینه
ایستی دوداغین،یئریکله ین قورشون دور

درک ائیله،اوتان،گئتمه،بوراخما بیزی سن
بیر لحظه،بیر آن،گئتمه،بوراخما بیزی سن
سن سیز بو حایات نه دیر؟ :جهنم چیچگی
ای عشق دایان،گئتمه،بوراخما بیزی سن

 

 

وئردین گؤزل ایّام منه،عشق اولسون
دونیادا سنینله گزنه عشق اولسون
سندن دی حایاتیم،نفسیم،هرزادیم
ای جانیمیز ای عشق،سنه عشق اولسون

سن فیکر ائلمه داغین ایچینده یاشادیم
جنّت ده،بولاغ-باغین ایچینده یاشادیم
بیر عمر عذاب چکدیم و جان وئردیم
بیر عدّه قورومساغین ایچینده یاشادیم

آجلیق چوخ ایدی،ظلم و ستم،غم واریدی
آدم چوخ ایدی،گوْزل آدام کم وارایدی
سیزدن خبریم یوخ دی،بیزیم دونیادا
مین یاندیریجی،یامان جهنّم وارایدی

داغلاری یاشیل و چوللری باغ اولسون
آغ دیر اوزوموز، اونون اوزو آغ اولسون
ویرانه شّهّر کیمین داغیلمیشدیم من
آباد ائله دی عشق منی ساغ اولسون

آخماق، الی اگری میللتی شاد اولماز
دوستاقدا قالار همیشه،آزاد اولماز
هر اؤلکه نی تسخیر ائله سین ائششکلیک
ویران اولار او مملکت آباد اولماز