ساغ اولسون

داغلاری یاشیل و چوللری باغ اولسون
آغ دیر اوزوموز، اونون اوزو آغ اولسون
ویرانه شَهّر کیمین داغیلمیشدیم من
آباد ائله دی عشق منی ساغ اولسون

عشق اولسون

وئردین گؤزل ایّام منه،عشق اولسون
دونیادا سنینله گزنه عشق اولسون
سندن دی حایاتیم،نفسیم،هرزادیم
ای جانیمیز ای عشق،سنه عشق اولسون

قورشون

الدَن وئریب عاغلینی،دلی مجنون دور

فرهاد کیمین،کَرَم کیمین وورغون دور

هرکس سنین آماجین اولوب، گؤزلرینه

ایستی دوداغین،یئریکله ین قورشون دور

اولدوز

سندن سورا یوخ اولدوز،ایشیق قلبیمده
قار،قیش دی،قارانلیق دی قیریق قلبیمده
سن سیز چوخ آغیر دی،زندگانلیق آجی دیر
اود توتموش و قارماقاریشیق قلبیمده

چوخ بیلمیش آدام

دونیانی گره ک عاقل آدام کم توتسون 
ُسئوگیلی آلیب قوجاغا محکم توتسون 
چوخ بیلمیش آدام جام شرابین بئلینی
محکم توتا قویماز اوره یین غم توتسون