غزل های طنز آمیز ترکی

‏من ائششگی شیشیلک و کباب ائیله‌دیم، اولدو

سیخدیم اوزومو،شیره،شراب ائیله‌دیم، اولدو

صیغه ائله دی بیر گؤزل آروادی منیم اوچون

سردفتری غرق میِ ناب ائیله‌دیم، اولدو

هی سؤیله‌دیلر کی دئمه هر ناکسه اینسان

اوغرو آداما "آغا"خطاب ائیله‌دیم، اولدو

چون چاتدی ریاست منه لاپ ایشلره سیچدیم

اینسانیت،اخلاقا پئشاب ائیله‌دیم، اولدو

بیر اوغرو قادین سویله‌دی:« قاچدیم وطنیمدَن

آیری یئره و ترک حجاب ائیله‌دیم، اولدو

چونکی الیمه موفته‌،اوغورلوق پولو گلدی

ایچدیم اوزومو مَست و خراب ائیله‌دیم، اولدو

واعظ دئییلم آمما دول آروادلاری گونده

هی عقد ائله‌دیم،صیغه،ثواب ائیله‌دیم، اولدو

چوخ یاوه دئدیم،شاعیر اولوب،شؤهرته چاتدیم

اشعاریمی دیوان و کیتاب ائیله‌دیم، اولدو

---

جاوان؛قاری؛قۏجانی سئل آپاردی!
دَرَه؛تپّه؛اۇجانی سئل آپاردی !

چراغیلان داها آختارما انسان !
تاپیلماز آی فلانی؛سئل آپاردی !

دئدی تلویزیون:«آی آرکاداشلار !
اروپا،آمریکانی سئل آپاردی»!

دولو دۆشدۆ چؤله؛اؤز صیغه سی لَن
بیزیم شیخی؛ژیانی؛سئل آپاردی !

باهالیق سئل کیمین بیر دفعه گلدی !
الی بوش بینوانی سئل آپاردی !

منیم فریادیمی اصلا ائشیتمیر !
مگر گؤیدن خدانی سئل آپاردی؟!!

نه ایمان قالدی بیزلرده نه انصاف !
ایگید هر قهرمانی سئل آپاردی !

سۆده از بس کی سۇ قاتدی؛سۇ ساتدی
داوارایلان چوبانی سئل آپاردی !

---

باها لیق ائتدی منی لال، تشککور ائدیرم !
نه پولوم وار نه ده بیر مال تشککور ائدیرم !

«مش حسن» آروادینا جمعه یاتان واختدا دئدی:
«سَندن ای بال دوداقی بال ،تشککورائدیرم»!

دیشسیز آروادینی آلدی قوجاقا،تولکو کیشی
سؤیلَدی:«آی قوجا چاققال تشککور ائدیرم»!

اَرینه یازدی:«بیر اویناشلی قادین،یاندیر ما
منی اؤلدور، قویویا سال تشککورائدیرم»!

ئیرمی ایل درس اوخودون دکترا آلدین،سونرا
اولمیسان سنده قارا مال تشککورائدیرم !

گئتدی آمریکایا قزوینلی گلن واختا دئدی :
«دییه بیلمم آدین،از«دال»تشککور ائدیرم»!

«رمضان» گئتدی،داها گئچدی قارین سسلنمگ !
سندن ای «اوّلِ شوّال» تشککور ائدیرم !

«رجب جعفری زاویه» تا من دیریم !
سندن ای «شاعر خلخال» تشککور ائدیرم !

سن دوزلتدین هامی یانلیشلاریمی شعریمده
نوکرم من سنه،ساغ قال،تشککورائدیرم !

---

دوبیت زیرهم از مرحوم  استاد رجب  جعفری  زاویه :

قـارداشـیـم ،جعفریـم،عالم شعر ایچره سنی
بیـلـیـرم زیـروه ده قـارتـال،تـشـکـکـور ائـدیـرم !

شرح و بسطیله ده یؤخ ؛ بو ایکی بیتیله داداش
تـکـجـه با صوـرت اجـمـال،تـشـکـکـور ائـدیـرم !

---

آج قالیب بس کی اوشاق ونگ ویریر وق وق وق !
آناسی باشینا کفگیری چالیر شق شق شق!

سوء تغذیّه توتوب بو قوجامان جامعه میز!
سسلنیر دیشلری هم قیچلاری هی لق لق لق!

چالما مظلوم آدامین بارماقوویلان قاپی سین
قاپیوی چالمیا تا چکّش ایلن تق تق تق!

او کی آللّاهیمیزا ذرّه جه ایمان یوخودور
خلق ایچینده هامی یئرده جیغیریر حق حق حق

نر گویرچین دئدی ویران یووا دا ماده سینه:
«سنی چوخ ایسته ییرم باور ائله بق بق بق

---

کسب زر و سیم،سعادت ائیله

اوغرولوغو بی نهایت ائیله!

پول قووزا ولیک خلق ایچینده

هی اوغرولاری شماتت ائیله!

هی زرزر اوشاق قازانما جانیم!

بیر ثانیه استراحت ائیله!

بس دیر دای اوتان،جماعدان ال چک

گل گئت نمازین  جماعت ائیله!

قانون یازان ای موجّه اینسان

قانونو بیر آز رعایت ائیله!

آی آج آدام،آی بئلی بوکولموش!

اؤیرنجیلری هدایت ائیله!

گئت داغلارا آجلیغین الیندن

باش چال داشا هی شیکایت ائیله!

ائششک آدامی گؤرنده  تعظیم

عرض ادب و ارادت ائیله !

گؤجلو دئییل  آمما ای اوخوجو

بوشعری اوخو روایت ائیله !!

---

یاندیر ای«حاجی حسن» درد،اختلاسی ریشه دن 

یانماسا چوخ گؤزله« قانون اساسی»ریشه دن

وئرمَه سَن بیر آن آمان بو مملکت ده«بید» لره

داش اوره گ اول،سال آیاغ آلتیندا«ساسی»ریشه دن

قوی بیرآز راحت دولانسین آی کیشی ارکک – دیشی

سالما آمما کؤینگی،شورتو،لباسی ریشه دن

گر یئرینده من اولام خوار ائیله رم یالتاقلاری

بمبیلان محوائیله رم تئز التماسی ریشه دن

گؤزله سو قطع اولماسین ساحیلده،یانقین دریادا 

یانماسین بیر دفعه «غسل ارتماسی»ریشه دن

بو اِئوه اوغرو گلیب،دوت بوغ،بو تولکو اوغرونو

چون آپاردی خالچانی،یاسدیق،پلاسی ریشه دن

---

الاغین آدینی جیران قویوبلار !

پیشیکین آدینی آسلان قویوبلار!

اداره بوشدورآمما یول کسَنلَر

قاپی قانشارینا دربان قویوبلار !

بویورگل«قزوینه»،بانکین اؤنونده

بو خلقه جایزه اوغلان قویوبلار !

اوره کلی اختلاسچیلا ربوگونلر

سیزین تک بیزلری حیرانقویوبلار !

رئیس ِ بانکی،بانکی،قوزاییبلار!

بیزیم ایچین بیرجیریق تومّان قویوبلار !

بیرینین آدینی « مشدی غضنفر»

بیرینین آدینی «یوهان» قویوبلار!

دئییردی بیر قوجا:«چوخ یاخچی گونلَر

گئدیبلَر کؤنلومو ویران قویوبلار»!

دِئمه هرگز یئیبلرموفته رشوه

بو یولدارشوه خورلار جان قویوبلار !!

دئدی بیرعارف انسان،بیرقیزیل سؤز:

"گدانین آدینی سلطان قویوبلار"

---

هرکیم ایستیر اؤزۆنۆ سرور ایّام ائله سین

باشلارا شیره یاخیب،خلقی گرک خام ائله سین

عاشیق،  میز و مقامات بیزه ثابت اولوب

گرچه کافردی گرک دعوی اسلام ائله سین

آدام اۏلماز، حَجَه تشریف آپاران ائششک آدام

کعبه دَه سجده و مین یۏل اگر احرام ائله سین

ایسته سَه عارف دۏران اۏلا هر کیم شک یوخ

دَله ایتلر کیمی نفسینی گرک رام ائله سین

منتقد کیم دی؟:بیرآلچاق بۏی آدام کی ایستر

شاعری خلقین ایچینده بد و بدنام ائله سین

دوزآدام واجب اولوب بانکاگئدیب،اوغرولارا

باش اَییب،رۆشوه وئریب،هی طلب وام ائله سین

بینوا شیشه چکیر،باده ایچیر شاعیریمیز

تاکی بیرثانیه ترک غم ایام ائله سین

---

یاتمیشام آمما اویانا بیلمیرَم

دؤزیولو،دؤز رسمی قانا بیلمیرَم

ائیله میشَم یوزمیلیار اختلاس

آخ! نَه دَن دیر اوتانا بیلمیرَم ؟

دوشدو دولو باشیما هی پول یاغیر

بیر چالادا دالدالانا بیلمیرَم !

قوزامیشام سئل گئتیرَن پوللاری

آمبارین آلتیندا سانا بیلمیرَم !

عقد ائدیرم قحبه، دول آروادلاری

قیزلارین عشقیندَه یانا بیلمیرَم !

من گئدیرَم «روسیه» دَه کئف چکیم

یوخسول آدام گلدی جانا؟بیلمیرَم

ایستَه ییرم «رَم»،«کانادا»یا گئدیم

پیس دی بو کشور دایانا بیلمیرَم

مملکتین یوللاری لاپ اگری دی

داغلاری داغ دی دولانا بیلمیرَم

ایشلری ناقص دی، یالان سؤزلری

دؤندو بو میللت یالانا؟بیلمیرَم !

قورخوجو،سون سوزدو قارانلیقللارا

باز ایشیق ؟ آی جالانا؟بیلمیرَم !

قحبه فلک قدریمیزی بیلمَه دی

ائششگی ساتدی پالانا؟بیلمیرَم

---

یئنی ایلده چا تارا م د ولته اینشاالله!
دولتیم ختم اولاجا ق ثروته اینشاالله!

اؤزومو گؤسترَه‌رم میللته بیر یاخشی آدام!
یئنه آرتیق ائله‌ رم طاعته اینشاالله!

«عشرتی»عقد ائدرَم،سونراسی ائودَه دایانیب

هی اس.ام.اس وئرَه رَم «عفتّه» اینشاالله

گئده‌ رم مکّه‌ یه یارانه پولوینا ن یئنی ایل!
قالمارام من ده بو بیر حسرته اینشاالله!

باغلا رام شور گؤزومو هر باخیشا آی باجی‌لار!
سیزه با خمام، باخارام ساعته اینشاالله!

غوصّه‌ دن پارتلا یارام صف‌ لرایچینده بیرگون!
آرخ ایچیند ه گئده‌رم رحمته اینشالله!

چونکو اؤلدوم چکه ‌رم ات دیشیمه جنت ‌د ه!
چا تارام من ده او گون لذته اینشاالله!

قاچا قاچا گئده‌رم حوریِ جنّت صفینه!
قویارام ساققالیمی نوبته اینشاالله!

من یالانچی آداما م،داما چیخیب آلقیشلار
دئیه ‌رم دامدا بود ؤز میللته اینشاالله!

سؤیله‌ دیم:«حاجی بویور،قاچما شراب ایچمک‌ دن»
دئدی:«بیر گون گله ‌رم خد مته اینشاالله »!

---

من دئییرم لطف ائله تحریر ائله

یاز بو یالان سؤزلری تکثیر ائله

کافر اول آمما دی:مسلمان منم
دؤز آدامی،مؤمنی تکفیر ائله !

میللته سؤز وئر،دی یالان سؤزلری
هر آدامین بئینینی تسخیر ائله !

مخلص آدام تاپ آدام اؤلدورماغا
باشینا یاخ شیره اونو شیرائله !

رای آلان واختی گؤزل وعده وئر
یئککه دانیش،شوغیله تغییر ائله !

میللته بیچاره موتور یاندیریب!
سال کلیدین ملتی تعمیر ائله !

پست و مقامی اوره یین ایسته دی
فیکرائلمه هابئله تزویر ائله

---

 اله آلدیم قلمی تا منه عزّت گئتیره

بیلمه‌دیم درد و عذاب و غم و ذلت گتیره !

چونکی خائن دئییلم چوخلو چتین دیر یاشاماق

 قلمی ساتمامیشام تا منه ثروت گئتیره !

انتقاد ائتمک ایله آرتیق اولوب دشمن‌لر

کیم دئییب‌دیر قلم اؤز اهلینه دولت گئتیره؟!

یازمایام تا که اونون عیبینی، زاهد گئتدی 

آغزیمی باغلاماغا،حوری جنّت گئتیره !!

ملتین دردینی شعرینده یازان شاعیردیر

خلقه حورمت ائله‌ین شاعیره حورمت گئتیره 

شعر یازدیم که بوشالسین اوره‌ییم غملردن

یازمادیم شعری کی شاید منه شهرت گئتیره !   

---

مملکت  ویرانه دیر،آباد اولسون یاخچی دیر

چونکی آباد اولدو لاپ  آزاد اولسون یاخچی دیر

بیر کیشی مچیددَه اوستوردو،دوروب خالغا دئدی:"

آغلاماق بس دیر،اؤرَکلر شاد اولسون یاخچی دیر"

چونکی گئتدین جبهه یَه ،سنگر دَه بش بشکه شراب

ویسکی و قیرخ بش گؤزل آرواد اولسون یاخچی دیر

بیر اوشاغدان فایده اولماز عزیزیم سعی ائله

هر کیشی دَه اون دَنَه اوولاد اولسون یاخچی دیر

قاشلاری نازک،دوداغی قیرمیزی،ساچلار اوزون

"مَش عبادین"آروادی "فرشاد"اولسون یاخچی دیر

بیر آدی باتمیش آدام شیخَه دئییردی کوچه دَه:"

منبرین اؤستؤندَه بیزدَن یاد اولسون یاخچی دیر"

ملّتی ارشاد ائدیر آمما اوزو یولدان چیخیب 

وئر تذکّر شیخ اگر ارشاد اولسون یاخچی دیر

اولمالی بیر شی دئییل آمما مشاور سؤیلَه دی:"

ائودَه آرواد:لیلی اَر فرهاد اولسون یاخچی دیر"

"مَش سلیمان" بِش دَنَه آرواد آلیب آمما گئنَه

بیر گئجه گیزلین گئدیب داماد اولسون یاخچی دیر

نومره لَر عالی ولی یوخدور آداملیغدان خبر

مهد و کانون ادب بنیاد اولسون یاخچی دیر

هرکسَه هر گوشَه دَه  میز و ریاست وئرسَه لَر

اوندا بیر آز عرضه،استعداد اولسون یاخچی دیر

پیس دئییل اشعاری آمما لاپ"کل اوغلان" طنز دَه

"صابر" و "مُعجز "کیمین استاد اولسون یاخچی دیر

---

عجله ائیلمه ای جان تلسمَه !
اولار جنّت بیزیم ایران تلسمَه!

حقوقون کی اولوب میزان امَکداش !
سبیلینده اولار میزان تلسمه !

ژنوده سؤیله دی«اشتون»«ظریفه»:

«گلر هی آشاغی تومّان تلسمه» !

گئدر بو اؤلکه دن پول قووزاماغی

قاچاراوغرو بیزیم دامدان تلسمه  !

قوروموش غنچه لر بیر بیر آچارلار
اولار گوم گوی گولوم هر یان تلسمه !

دئمه سَن آی کیشی «سؤز اؤز سؤزوم دور»
وئرَر آرواد سنه فرمان تلسمه !

قیزی آلما آنایا باخ سورا تاخ !
تورا دؤشمه سن آی اوغلان تلسمه !

اگر کی آرواد آلدین یونگول اولما
دئمه هی آروادا «جان جان » تلسمه !

حقوقونله گئدرسن انگلیسه
«نیوکاسل»اولار«تهران » تلسمه !

بو تحریم لر اثر ائتمز،عزیزیم
قودوق صادر اولار آسان تلسمه !

سنی بانک باشقانی دایم سالاملار
سنه ناز ایلمَز دربان تلسمه !!

---

یاتمیشام آمما اویانا بیلمیرَم

دؤزیولو،دؤز رسمی قانا بیلمیرَم

ائیله میشَم یوز میلیار اختلاس

آخ! نَه دَن دیر اوتانا بیلمیرَم ؟

دوشدو دولو باشیما هی پول یاغیر

بیر چالادا دالدالانا بیلمیرَم !

قوزامیشام سئل گئتیرَن پوللاری

آمبارین آلتیندا سانا بیلمیرَم !

عقد ائدیرم قحبه،دول آروادلاری

قیزلارین عشقیندَه یانا بیلمیرَم !

من گئدیرَم «روسیه» دَه کئف چکیم

یوخسول آدام گلدی جانا؟بیلمیرَم

ایستَه ییرم «رُم»،«کانادا»یا گئدیم

پیس دی بو کشور دایانا بیلمیرَم

مملکتین یوللاری لاپ اگری دی

داغلاری داغ دی دولانا بیلمیرَم

ایشلری ناقص دی،یالان سؤزلری

دؤندو بو میللت یالانا؟بیلمیرَم !

قورخوجو،سون سوزدو قارانلیقللارا

باز ایشیق؟آی جالانا؟بیلمیرَم !

قحبه فلک قدریمیزی بیلمَه دی

ائششگی ساتدی پالانا؟بیلمیرَم !

---

رایین مَنَه وئر،وئرمه«مَششه اصغرَه »آی قیز!

زیر اوئرَه رَم من سنی بیرگؤن ارَه آی قیز!

رایین مَنه وئردین ائوَه گئت،یات داهاراحت!

نفتین پولونو آل یئمَه بوم بوش ترَه آی قیز!

یارانه نی من آرتیرارام بش میلیونا!

یارانه نی آل گئت پاریسه یکسَرَه آی قیز!

من شورایا چیخسام داهاباسمازسنی آجلیق!

زیرا سنَه تقدیم ائدرم بال- کرَه آی قیز!

هر یئردَه حمایت ائدرم قیزحقوقوندان!

تشبیه ائدرم من سنی شیر نرَه آی قیز!

آیری آداما سالما گؤزل راییوی زیرا

قالماز بو گؤزل وعده لریم محشرَه آی قیز!

من دؤزآدامام شخصیتیم قابل تقدیر!

هی خلقین ایچینده اؤزوم اولماز قرَه آی قیز!

قورخمام،بیراؤرکلی آدامام ساری رقیبیم

بیچاره قارالتی کیمی دیر،مسخره آی قیز!

---

قوجاقین اوخشور احسان سیز بهشته !

منی یول وئر او دربان سیز بهشته !

اؤزون هی باغلاما کؤینک،تومانا !

گئدرسن با جی! تومّان سیز بهشته !

داوارچی«مشدی ایمان»هی وئریر خرج

کی گئدسین کافر،ایمان سیز بهشته !

چکیر آجلیق قوجا تا حوری آلسین

تا پا جان،گئتدی چون جان سیز بهشته !

بهشتین ایچره کنتور یوخدو کئفلن

گلر گاز پولو یورغان سیز بهشته ؟!

دئدی قزوینلی رضوانه:« سن آلله !

منی گؤندرمَه غلمان سیز بهشته »!

جهنّم دیر اگر گلسه عزیزیم

یالانچی ،اوغرو،وجدان سیز بهشته !

---

کؤنلوموز آباد اولار بوندان سورا!

غصّه لر بر باد اولار بوندان سورا!

«مش عبادین»آروادی شیرین اولوب!

کؤک اری فرهاد اولار بوندان سورا

ائوله نرآ تمیش یاشیندا اوغلوموز!

بیر گئجه داماد اولار سورا!

موزیئییب اسکیک بئلی آرنولد کیمین

آهن و فولاد اولار بوندان سورا!

مملکت ائیلَرترقّی،هر کیشی

تابع آرواد اولار بوندان سورا!

جیبیمیز پولدان دولار،باورائله

پولوموزمازاد اولار بوندان سورا!

هرساواد سیزمدرک لیسانس آلیب

دکتر و استاد اولار بوندان سورا!

عشق ائدرلرخلق و ایران اؤلکه سین

آدی«عشق آباد» اولار بوندان سورا!

---

اوغرو داداش ملته خدمت ائله

مملکتی لطف ائله،غارت ائله

تَرک ائله مه اوغرولوغو،چاپماغی
اوغرولاری آمما نصیحت ائله

بویونو یوغون اوغرولاری دوز یولا
جمع ده،مجلس ده هدایت ائله

تاپدون اگروقت دره-تپه دن،
اوینابیر آز فیلم شکایت  ائله

بیردن آپارما دکلی،کشتی نی
آزآز آپار، رسمی رعایت ائله

ببرالی اگری آدامی تاپ،قیزین
ائیله نیشان سونراسی وصلت ائله

ورد زبان ائیله یالان سوزلری
مسجده گئت قبله وی ثروت ائله

چون اله آلدین تریبون هی جیغیر
اوغرولاری دانلا،ملامت ائله

خلقه یالان سات دی: گئدین دؤز یولا !
اوغرولاراعرض ارادت ائله

دولدون حسابین بلیت آل بیرگئجه
انگلیسه،آلمانا هجرت ائله

---

اؤرَه گیم یاندی بو گؤن سؤفرَده ای اَت سَن سیز

گل قاییت سؤفرَه یَه چون قالمادی طاقت سَن سیز

بؤیوک اوغرو بالاجا اوغرویا یازدی:"یولداش

ائیله دیم هامی وطن داشلاری غارت سن سیز

گرچه آللاه دئییل سَن بیزه ای پول آمما

ائیله مَز بیر نفر آللاها عبادت سَن سیز

ای تویوق توتماق اؤزون چونکوآ جیندان اؤله جاق

بو دَله،آج، گؤزو آج اوغرو جماعت سَن سیز

هاردان سان من سَنی چوخدان گزیرم ای وجدان

اولدو بو جامعه میز گؤر نَه کثافت سَن سیز

یورغان آلتیندا دئدی بیر کولی آرواد، ارینه

گئجه گؤندوز گزیرم هر یئری راحت سَن سیز

لوطفون اولسون بیزه،ترک ائتمَه بیزی "یارانه"

دلی- دیوانه اولار چونکو بو ملت سَن سیز

---

زاهد یالان دئدی ؛ هامی زادی اوغورلادی 
آللاهی ؛ اعتقادی ؛ معادی اوغورلادی !

گئتدیم دونن دواخانایا ؛گلد ی بیر نفر
شربت ؛ سرنگی ؛ قرصی ؛ پمادی اوغورلادی !

اولدو رئیس شهریمیزین بی سوادی تا
مدرک دوزلتدی؛علم و سوادی اوغورلادی !

تا کی اونون حکومتی چوخ پایدار اولا
شمری؛یزیدی؛ابن زیادی اوغورلادی !

یوخسول بالاسی مدرسه ده همّت اِیلَدی 
دفتر؛کتابی؛پولو؛مدادی اوغورلادی !

ویردی ستاد شهریمیزین اوغروسی اگر
اوغری رقیبی گلدی ستادی اوغورلادی !!

یؤل تاپدی تا خزانه یه «حاجی مراد یمیز»
ائتدی اشاره پوللاری«هادی»اوغورلادی !!

مامورآد یلا« رمضان»؛چیخدی داملارا
دیشی؛«ال.ام.بی.»نی؛هامی زادی اوغورلادی!!

---

زاهد ائله دی ملّتی غارت،دئدی:مرسی
مسجددَه گئدیب آلدی طهارت،دئدی مرسی

نفتین پولونو چکدی یوخاری،چاخیر ایچدی
چون ائیله دی لاپ دفع ملالت،دئدی:مرسی

آج قونشولاری گؤردو ولیکن او حیاسیز
هیچ چکمَه دی بیر ذرّه خجالت،دئدی:مرسی

حؤرمتلی بویوک اوغرولارا بیر کیچیک اوغرو
هر گؤن ائله دی عرض ارادت،دئدی:مرسی

پول آلدی ناماز قیلدی،گؤزل شیخی گؤرَندَه
هم مؤمن و هم اهل ضلالت،دئدی:مرسی

ظلم ائیله دی ارباب رجوعا گئده قاضی
چون گؤردو کی هئچ یوخدو عدالت دئدی مرسی

اولوبلار آج و آج میللت دَه دین یوخ 
بو میللت دَه به غیر از آج قارین یوخ

سیچیب دونیایا گل گؤر، دی :یاشاسین!
ترامپِ بینی بوش،  "چین"و  " پوتین" یوخ!

تاپیلمیر " وارفارین" ایراندا بیرگؤن
تاپیلسا، هی گئت آختار "انسولین" یوخ

قیز- اوغلانلار سوبای، دئپرس، کَدَرلی
زنا و صیغه چوخ دور، توی، کبین یوخ

نَه دیر ایران؟: بولاشیق بیر خیارلیق 
بو بوستاندا آراماق و وجین یوخ

اولار خوش حالینا یولداش، اگر کی
اوشاغین یا کی آروادین، اَرین، یوخ

چاتار بیر گؤن مَنَه "حافظ" چالیشسین
اگر سعی ائیله سین" ابن یمین" یوخ

" کل اوغلانین" بوتون اشعاری یاوه 
مزخرف دیر،دَیَرلی و دَرین یوخ

---

دوغوم گوندن چکیب حسرت الی بوش

آلین یازیسی دیر ذلت الی بوش

بیرآرواد وار سککیز دوققوز اوشاقی

ائدیب تولید ده شرکت الی بوش

فلاکت دریاسیندا غرق اولوبدور

نجاتا تاپمیوب فرصت الی بوش

قوناقلیغا ائشیتدیم دعوت اولدو

تویوغا وئرمه دی مهلت الی بوش

بوراخدی آروادی آجلیق گوجوندن

دؤنن تا ائیله دی وصلت الی بوش

باغیرساقی اولار آباد اگرکی

گتیرسین یوزمین ایل طاقت الی بوش

اؤله ر بورجون سونوندا،بورج باشیندا

دیری دیر بیر نئچه مدّت الی بوش

بهشته ایسته ییر یول تاپسا ،شاید

بیر آزجا ائیله سین عشرت الی بوش

اون – اون بش درصدی وارلی،ولیکن

تپرسیز،آج،بیر ملت،الی بوش

پولون اولسا کیشی،ارباب،آغاسان

اگرکی اولماسا،نکبت الی بوش

توکوب یارانه دولت،بانک اونونده

توتوب هرکیمسه دن سبقت الی بوش

---

جۆجه،تۏیۇق،رانا اَلیم چاتمادی !

دلبر جانانا اَلیم چاتمادی!

رشوه نی وئردیم گؤزل افسرلره!

چۆنکۆ گرۇهبانا الیم چاتمادی!

لۆت گزیرم کۆچه ده مجنون کیمین !

بیر پارا تومّانا اَلیم چاتمادی !

تۇتدۇم اۏرۇج،کعبه ده قیلدیم ناماز !

آللاها،ایمانا اَلیم چاتمادی!

میزی سئون حاکمی گئتدیم گؤرۆم

قاپییا، دربانا اَلیم چاتمادی !

گلدی یۇخۇما «حاجی اکبر » دئدی :

« حوریا،قیلمانا اَلیم چاتمادی »

سن هله مین مۆفته «پرادو»لاری

دنده یه،فرمانا اَلیم چاتمادی!

شیطانا درس اؤیره‌دیرسن،هئی دئمه

ایزد سبحانا الیم چاتمادی !

سۆفره قیراغیندا اۏتۇردۇم ، ولی

قیمه ، فیسنجانا الیم چاتمادی !

دیش وئریب آرپا چورگین وئرمَدی

صاحب دندانا اَلیم چاتمادی !

قیسمتم اۏلدۇ قۇرۇ حسرت یئمَک

باغا ، گۆلستانا الیم چاتمادی !

تاکی سیزین وارلیقیزی یۆکله‌یم

پیکانا ، نیسانا اَلیم چاتمادی !

قۏیمادیلارکی اؤزۆمۆ اؤلدۆرۆم

نقطه ی پایانا اَلیم چاتمادی

---

یوخسول آدام کی شُهره اولوبدور ریاضته !
احسنت اونداکی دؤزومَه ؛ استقامته !

صَفده ازیلدی جوجه تک اولدو دیدیک دیدیک !
چاتدی تویوق صَفینده عم اوغلو شهادته !

من ایستیرم سنی بوراخیم؛سن بوراخمیسان !
قالدی طلا قیمیز بیزیم آرواد قیامته !

خلقین ایچینده چونکو قباحتلیدور طلاق !
آرواد کیشیلر اوز گَتیریبلر خیانته !

ایراندا باشلا نیبد یر المپیکِ اختلاس !
بیر عدّه اوغرولوغدا دوشوبلار رقابته !

مسجدده گؤردو بیرکَره بیرکرَه بیر نازلی قامتی
ساتدی بهشتی زاهدِ عاقل او قامته !

اودلاندی دادگایهدا الی بوش آدام دئدی :
«قاضی کی رشوه آلماسا گئتمز قضاوته»!

ائوده د ئدی کی:«من گئدیرم مشهده صاباح»!
تایلنده گئتدی حاجی فلانی زیارته !!

اوغرولارین رئیسینه یازد یم دونن گئجه :
«توت اوغرولاری،چون ائویمیز گئتدی غارته» !

قارداشلارین شعاری بودور: قوزا هر زادی !
باخما حلال ؛ حراما،توپورسن قباحته !

سَن وئر ریاستی منه ؛ باخ گؤر کی من نئجه
میلیارد اختلاس ائدَرم ایکی ساعته !!

شعریم غلط دئییل بیلورم وار فصاحتی
آمما اهمیّت وئره رم من بلاغته

---

گلیر شمرین باباسی بیر طرف دَن

حوسینین مبتلاسی بیر طرف دن

قارا کوینَک گئییب «حاجی سلیمان»

توکور قان- یاش آتاسی بیر طرف دَن

یاخیب ماتیک گؤتو بشکه« فرشته»

اولوب جیران بالاسی بیر طرف دَن

سئویر«تهمینه» نی الیاسین اوغلو

دئیر رستم:"قاداسی" بیر طرف دن

«سکینه دایقیزی» چای پایلاماغدا

باغیشلاندی خطاسی بیر طرف دن

الی اگری رئیسین باغری قان دیر

باشا گلمیر اداسی بیر طرف دن

اورکدن آغلاییر دوزگون،گول اوغلان

دَله،شهرت گداسی بیر طرف دن

یئره بیر عالمه لیوان توکوبلر

باتیق شهرین فضاسی بیر طرف دن

قیز-اوغلاندا حیا یوخدور گئدیبدیر

ار-آروادین حیاسی بیر طرف دن

ائدیب غیبت «پری»هیئت ده مین یول

اولوب تامین غذاسی بیر طرف دن

گؤیَه قالخیب جیریق طبلین صداسی

دول آروادین دعاسی بیر طرف دن

محرّم دیر منی آغلاتدی آجلیق

حوسینین ماجراسی بیر طرف دن

---

بال دی،شکردی پیشیگین آروادی

آدی سحردی پیشیگین آروادی!

آددیم آتیب چیخدی حَیَطدَن داما!

اهل سفردی پیشیگین آروادی!

حافظی،سعدینی گئدیب حفظ اددیب

اهل نظردی پیشیگین آروادی!

عؤمرو کئچیردیب رُژلب یاخماغا

کان هنردی پیشیگین آروادی!

گؤز دیبینه قارا بادیمجانلاری

یاخچی اکردی پیشیگین آرودای!

تیریاکی،بنگی،شیره نی ترک ائدیب!

شیشه چَکَردی پیشیگین آروادی!

اخلاقی چوخ یاخشی ایدی، سئوگیلی

آلتی نفردی پیشیگین آروادی

---

یول کسَن اکبرَه سلام اولسون !

اوغرو حاج اصغرَه سلام اولسون !

چایچی یَه،رشوه یَه،ایداره لرَه!

منشی یَه، دفترَه ،سلام اولسون !

اری قیز باز و آرواد اویناش باز!

بوجور آرواد–ارَه سلام اولسون !

اختلاس ائیله دی بش- اون میلیارد !

مال یایان صَفدَره سلام اولسون !

داها باغلانماسین قَه وَه خاناسی !

چای وئرَن قنبرَه سلام اولسون !

سنگک و بربری باهالاشدی !

چورَه گه،شاطرَه سلام اولسون !

گؤتوبوش قونشوموز- قاراصفرَه-

باجیسی دلبرَه سلام اولسون !

یوخسول اینسان دئدی:«دَدَم یاندی!

قاچدی بوردان هرَه »سلام اولسون !

قونشوموز آروادین بوشاندیردی !

آروادی هاجرَه سلام اولسون !

عقدائدیر،هی طلاق وئریر ،پول آلیر !

صاحب محضرَه سلام اولسون !

الیمیز چاتمادی،ولی هرکس

یئدی کهلیک،کرَه،سلام اولسون !

گئتدی میخانه یَه،دئدی بیر مست :

«ساقی یَه،ساغرَه سلام اولسون »!

-شعرینی  ساتمادی اگر شاعر

شعرینه،شاعرَه سلام اولسون !

ملانصرالدینه،دمکراسی یَه

طنزیازان صابره سلام اولسون!

---

وار آج گوز آدام،آج،دَلی،چیلپاق بو شَهَرده
بیر گون ییخیلار چون دولو چاتلاق بو شَهَرده

گؤی دَن آجی، پیس ،درد و بلادان سورا یاغمیر
دریا،گؤل اولور چؤل، قورو،دوزلاق بو شَهَرده

دولت ده توکور طالع ایله دام،باجالاردان
کول باش آدامین باشینا تورپاق بو شَهَرده

مسئوللاری اوغرو،باجی،قارداش الی ایری
کؤک دَن پوزولوب حؤرمت و اخلاق بو شَهَرده

بیر قورد سمیناردا دانیشدی دئدی : ملت !
امنیّت جانی یوخو اوغلاق بو شَهَرده

قوربان کسیلیب بَللی دی کی ذرّه جَه چاتماز
یوخسول آداما،کاسیبا،داششاق بو شَهَرده

آرواد-کیشی نین کارخاناسی باغلانا بیلمَز
تولید اولاجاق هئی دَلی،آخماق بو شَهَرده

---

به غیر حسرت آپارماز بشر بودونیادان
قوتور کئچی کئچر و شیر نر بو دونیادان

غرورو ترک ائله، دایم مَنم مّنم ائله مَه
سّنی ده توپراق ائدَر، الحذر بو دونیادان

دّرین دَنیزدیر آدام اوغلونو بَتَر بوغاجاق
نجات تاپمایاجاق بیر نفر بو دونیادان

وئریر میللته دائم خبر او دونیادان
اگرچه شیخ ده یوخدور خبر بو دونیادان

فلاسفه بویوروبلار، منیم سؤزوم ده بودور
بیرآز لذّت آپار مختصر بو دونیادان

اگرچه درس اوخویوب، لاپ سفیه دی نوع بشر
قودوق گلیبدیر و ائششک گئدر بو دونیادان