قالیهای ترکی

قهر ائدیب پیر و جوانا اهرین زلزله سی 

عالمی گئتدی فغانا اهرین زلزله سی

"ورزقان" شهرینی ییخدی؛هریسی ائتدی وئران 

یئنه قاتدی قانی قانا اهرین زلزله سی 

اولدوروب کؤرپَه نی،آغ ساققالی؛آغ بیرچگی دَه

باخمادی خانَه؛چوبانا اهرین زلزله سی 

توکدو یارپاق کیمی اینسانلاری ظولمیله یئره

اوخشادی باد خزانا اهرین زلزله سی

مردمین کونلونو یاندیردی؛یامان ائتدی کباب

اود ویران واختدا تیکانا اهرین زلزله سی

تازه دامادیله،تازه گلینی اؤلدوردو 

قوجانی سالدی زیانا اهرین زلزله سی

باخمادی فقره،اوروج آغزا،ساری رخسارا

شب قدره،رمضانا،اهرین زلزله سی

کیمسه سیز خلقین ائوین ییخدی؛داغیتدی کؤکدَن

ویردی اود خورد و کلانا  اهرین زلزله سی

پایه سیز ائولری دیوانه فلک ویردی یئره

گوجونو قویدو کمانا اهرین زلزله سی 

قیزلارین یاخشی تخیّوللاری،رؤیالارینی

دؤندریب گؤرنه یامانا اهرین زلزله سی !!

من کی تصویر ائده بیلمم بو یامان فاجعه نی

وصفی گلمز کی بیانا  اهرین زلزله سی 

اردبیل شهرینی؛گیلانی تکان وئردی تمام

گلدی قزوین؛همدانا  اهرین زلزله سی

یئنه بو زلزله بش گؤنده چیخار یادلاردان

کئشکه مسئوللار اویانا....اهرین زلزله سی

---

قزوینیم،آی قزوینیم!

سن جیگریم،سن دینینم !

آیاق داشین مَثل دیر!

پسته لرین گؤزل دیر !

ایستکلی دیرباغلارین

ویقارلی دیرداغلارین !

نان ِ برنجین اعلا

کوچه لرین آوروپا !

باقلوانین شهری سن!

دهخدانین شهری سن!

عُبید سَن دَه یاشاییب

سَنی چوخ آلقیشلاییب !

وَطنَه دلدادَه دیر

عارفین آزادَه دیر!

اؤزؤمؤن وار،شرابین

دؤنیا :دَلی،خرابین!

شازدَه حسین سَراسی

اؤرَکلرین ماواسی !

سئویندیریرآدامی

قَجَرلرین حامامی !

سبزَه میداندا بوتون

پاریلداییر چلستون !

گئتمَمیشَم بیرایل دیر

مَغلواکین قیزیل دیر !

مست اولوب باخماز جاما

خیّام گلسَه خیّاما !

دَیَروئریبدیر سَنَه

گؤزَل سَعدالسّلطنَه !

دربکوشکون قدیمی

آداملارین صمیمی !

سئودیم شهرآراسینی

تهران دروازاسینی !

مولوی،هریانینی

سپه خیابانینی !

تاکستانی،الوندی

ضیاآباد،تاکندی !

قزوین، ای عشق دایاغی!

عاشیغلارین اوجاغی،

ای دونیانین باهاری !

قوناغلارین دیاری!

اومورام ساغ قالاسان

لاپ ایستی،داغ قالاسان !

---

ایستکلی گؤزل یوردوم،قزوینه سلام اولسون !

من فرهادام اوشیرین،شیرینه سلام اولسون

قزوینه سلام اولسون

تاکستانا،الونده،آبیکه وتاکنده

هرکوچه یَه،هرکنده،

هردینه سلام اولسون

قزوینه سلام اولسون!

اوغلان،کیشی آروادا

هرکیمسه یَه،هرزادا

گؤزیوردو ضیابادا

کاسیبلرینه،پوللو،مسکینه سلام اولسون

قزوینه سلام اولسون!

جنت دی قاقازانی

داغ- داشلاری،هریانی

دشتابی،بوئین زهرا

خوشحال آداما،یورغون، غمگینه سلام اولسون

قزوینه سلام اولسون!

باقلاواسی لاپ شیرین

پسته سی دَه  اعلادیر

لندن دی باراجینی

خیامی اروپادیر

هربیرخیابانینداوار پینه سلام اولسون !

قزوینه سلام اولسون

قزوینه سلام اولسون!

---

سحر یوخودان دوردوم
خارجَه قاچماق ایچین
بیر گؤزَل،یئنی قاپی
اوزومه آچماق ایچین

گؤردوم اَل چَکَه بیلمَم
ائویمدَن،وَطنیمدَن
وطنین عشقی چیخماز
روحومدان،بَدنیمدَن

آلداتدیم هی اؤزومو
دئدیم آزادلیق گَلر
بیرگون بیزیم اولکه یَه
راحاتلیق،شادلیق گَلر

درد،آجی، عذاب چَکیب
عؤمور بویو یورودوم
یورغون،پوزغون وطن دَه
قالدیم،اؤلدوم،چورودوم
Səhər yuxudan durdum
Xaricə qaçmaq için
Bir gözəl,yeni qapi
Üzümə açmaq için

Gördüm əl çəkə bilməm
Evimdən,vətənimdən
Vətənin eşqi çıxmaz
Ruhumdan,bədənimdən

Aldatdim hı özümü
Dedim azadliq gələr
Bir gün bizim ölkəyə
Rahatlıq,şadliq gələr

Dərd,acı,əzab çəkib
Ömür büyü yürüdüm
Yorğun,pozğun vətəndə
Qaldim,öldüm,çürüdüm

---

بیر توخ آدام، آجی گؤرسون
درد چکمز، غم-غصّه یئمز
آج آدامی درک ائله مز
اوتانماز، اؤلمَز، اریمز

اوروج توتوب، ناماز قیلار
بوینو ائششک بوینو کیمین
میللتی لاپ دین سیز بیلر
اؤزونو، مؤمن،  اهل دین

مسجدلره هئچ کیم گئدمیر
بوشالیب دای هئچ واخت دولماز
قدیم کیلر دؤز دئیب لر
آج قاریندا ایمان اولماز