ائششکلیک

آخماق، الی اگری میللتی شاد اولماز
دوستاقدا قالار همیشه،آزاد اولماز
هر اؤلکه نی تسخیر ائله سین ائششکلیک
ویران اولار او مملکت آباد اولماز

ساغ اولسون

داغلاری یاشیل و چوللری باغ اولسون
آغ دیر اوزوموز، اونون اوزو آغ اولسون
ویرانه شَهّر کیمین داغیلمیشدیم من
آباد ائله دی عشق منی ساغ اولسون

عشق اولسون

وئردین گؤزل ایّام منه،عشق اولسون
دونیادا سنینله گزنه عشق اولسون
سندن دی حایاتیم،نفسیم،هرزادیم
ای جانیمیز ای عشق،سنه عشق اولسون

ای عشق

درک ائیله،اوتان،گئتمه،بوراخما بیزی سن
بیر لحظه،بیر آن،گئتمه،بوراخما بیزی سن
سن سیز بو حایات نه دیر؟ :جهنم چیچگی
ای عشق دایان،گئتمه،بوراخما بیزی سن

صبر ائت

ای بادا گئدیب جلالی صبر ائت صبر ائت
داغ- داش،مئشه نین مارالی صبر  ائت،صبر ائت
مرهم اولاجاق دردلرینه اؤزگورلوک
ای قلبی درین یارالی صبر ائت،صبر ائت

Ey bada gedib cəlalı səbr et,səbr et.
Dağ-daş, meşənin maralı səbr et səbr et.
Mərhəm olacaq dərdlərinə özgürlük
Ey qəlbi dərin yaralı səbr et, səbr et