بو دونیادان

به غیر حسرت آپارماز بشر بودونیادان
قوتور کئچی کئچر و شیر نر بو دونیادان

غرورو ترک ائله، دایم مَنم مّنم ائله مَه
سّنی ده توپراق ائدَر، الحذر بو دونیادان

دّرین دَنیزدیر آدام اوغلونو بَتَر بوغاجاق
نجات تاپمایاجاق بیر نفر بو دونیادان

وئریر میللته دائم خبر او دونیادان
اگرچه شیخ ده یوخدور خبر بو دونیادان

فلاسفه بویوروبلار، منیم سؤزوم ده بودور
بیرآز لذّت آپار مختصر بو دونیادان

اگرچه درس اوخویوب، لاپ سفیه دی نوع بشر
قودوق گلیبدیر و ائششک گئدر بو دونیادان

ایشیق

قارما-قاریشیق اولما
هر کیمَه عاشیق اولما
آنلاماز،کؤر آداما
گؤنش،آی،ایشیق اولما
qarmaqarışıq olma
Hər kimə aşıq olma
Anlamaz, kor adama
Günəş, ay, işıq olma

ائششک شناسی

قوش بئیین، مال باش آدام ترک ائیله مز آخماقلیغی
آی کیشی من اَللی ترم ائششک شناسی خوانده ام

اولوم

آزاد یا اسیر اولسان
یوخسول یا امیر اولسان
اؤلوم سنی سیندیرار
داش اولسان، دمیر اولسان
Azad ya əsir olsan
Yoxsul ya əmir olsan

Ölüm səni sindirar
Daş olsan, dəmir olsan

آنلاماق

آنلاماق اود-اوجاق دیر
راحاتلیغدان اوزاق دیر
بوتون سیخینتی لارین
قایناغی آنلاماق دیر
Anlamaq od-ocaqdir
rahatlıqdan uzaqdir
bütün sıxıntılarin
qaynaği anlamaqdir