سن سن

باغیم، بولبولوم سن سن

دنیزیم،گولوم سن سن

قلبیمین باغچاسیندا 

سولمایان گولوم سن سن 

bağim,bülbülüm,sən sən

denizim,gönlüm,sən sən

qəlbimin bağçasinda 

solmayan gülüm sən sən

آج

سو، برقه،پولا، اؤزگه یَه محتاج اولسون
گئتسین ایشه اوندان سورا اخراج اولسون
تا چاره سیز، آج میللتی درک ائله سین
آرزو ائدیرم کی شیخ ده آج اولسون

نه ایشیم وار

ایران ایَه تقسیم اولور،اولسون نه ایشین وار

هر کیمسَه یَه تقدیم اولور اولسون نه ایشین وار

مین ایل ایَه تحریم اولور اولسون نه ایشین وار

قیشقرما،بوراخ کاخیده راحت گئجه یاتسین
راضی دئییلم اوغرولاری کیمسَه اویاتسین
قوی سئوگیلینه چونکو قاچیب خارجه چاتسین
چاپسین یییَه سیز مملکتی اؤزگه یَه ساتسین
ایران ایَه تقسیم اولور اولسون نه ایشین وار
هر کیمسَه یَه تقدیم اولور اولسون نه ایشین وار

سالما یادا راحتلیغی و اسکی زامانی
ائششک کیمین ایشله،ائله مَه شکوه فلانی
سَپمَه باشینا هی قارا توپراغی،سامانی
چوخداندی بوتون سئل آپاریب یاخچی-یامانی
ایران ایَه تقسیم اولور اولسون نه ایشین وار 
هر کیمسَه یَه تقدیم اولور اولسون نه ایشین وار

ترک ائیله غم و غصّه نی و فکر و خیالی
فیکر ائیله کی اوضاع اولوب ایستَکلی و عالی
لطف ائیله بوراخ بحث و جدل،قال مقالی
آخیر سَنَه نه کی "دلار" اؤلدوردو "ریالی"
ایران ایَه تقسیم اولور اولسون نه ایشین وار
هر کیمسَه یَه تقدیم اولور اولسون نه ایشین وار

آغلاردی ائشیتدیم بو سؤزو "حاجی صفر"دَن
آجام اؤلورَم غصّه ایله درد کمردَن
یاندی اؤره ییم چونکو ائشیتدیم بو خبردَن:
ایرانین اوزولدو الی دریای خزردَن
ایران ایَه تقسیم اولور اولسون نه ایشین وار
هر کیمسَه یَه تقدیم اولور اولسون نه ایشین وار

اخلاق

سؤیله دی گون اورتا گئتدیم مسجده

اوغرولار جازلادیلار باشماغیمی !

اعتراض ائتدیم ولی مردم دوتوب

زیرزمین ده چکدیلر داششاغیمی !

کوچه ده پارک ایله دیم ماشینیمی

قوزادیلار چرخ ایلن  قالپاغیمی !!

ات ساتان،بنّا،چورکچی،جوشکار

ویردیلار دین آدیلا خیرتلاغیمی !

ایککی اؤزلو اوغرو مؤمن لر بوتون

بولدوزور تک پوزدولار اخلاقیمی !

آی قیز

رایین مَنَه وئر،وئرمه«مَششه اصغرَه »آی قیز!

زیر اوئرَه رَم من سنی بیرگؤن ارَه آی قیز!

رایین مَنه وئردین ائوَه گئت،یات داهاراحت!

نفتین پولونو آل یئمَه بوم بوش ترَه آی قیز!

یارانه نی من آرتیرارام بش میلیونا!

یارانه نی آل گئت پاریسه یکسَرَه آی قیز!

من شورایا چیخسام داهاباسمازسنی آجلیق!

زیرا سنَه تقدیم ائدرم بال- کرَه آی قیز!

هر یئردَه حمایت ائدرم قیزحقوقوندان!

تشبیه ائدرم من سنی شیر نرَه آی قیز!

آیری آداما سالما گؤزل راییوی زیرا

قالماز بو گؤزل وعده لریم محشرَه آی قیز!

من دؤزآدامام شخصیتیم قابل تقدیر!

هی خلقین ایچینده اؤزوم اولماز قرَه آی قیز!

قورخمام،بیراؤرکلی آدامام ساری رقیبیم

بیچاره قارالتی کیمی دیر،مسخره آی قیز!