آنغیرماق

می گفت کسی به ائششک و آتِ کسی

هرگز نشوی وورولموش و ماتِ کسی

با پول و سامان و یونجا و آنغیرماق

تغییر ائله مز عقیده و ذاتِ کسی

قاراباغ

باغیندا ایزیم اولار

شوشا،تبریزیم اولار

دوست بیلیر،دوشمن بیلیر

قاراباغ بیزیم اولار

Bağında izim olar

Şuşa Təbrizim olar

Dost bilir, düşmən bilir 

Qarabağ bizim olar

تلسمَه

عجله ائیلمه ای جان تلسمَه !
اولار جنّت بیزیم ایران تلسمَه!

حقوقون کی اولوب میزان امَکداش !
سبیلینده اولار میزان تلسمه !

ژنوده سؤیله دی«اشتون»«ظریفه»:

«گلر هی آشاغی تومّان تلسمه» !

گئدر بو اؤلکه دن پول قووزاماغی

قاچاراوغرو بیزیم دامدان تلسمه  !

قوروموش غنچه لر بیر بیر آچارلار
اولار گوم گوی گولوم هر یان تلسمه !

دئمه سَن آی کیشی «سؤز اؤز سؤزوم دور»
وئرَر آرواد سنه فرمان تلسمه !

قیزی آلما آنایا باخ سورا تاخ !
تورا دؤشمه سن آی اوغلان تلسمه !

اگر کی آرواد آلدین یونگول اولما
دئمه هی آروادا «جان جان » تلسمه !

حقوقونله گئدرسن انگلیسه
«نیوکاسل»اولار«تهران » تلسمه !

بو تحریم لر اثر ائتمز،عزیزیم
قودوق صادر اولار آسان تلسمه !

سنی بانک باشقانی دایم سالاملار
سنه ناز ایلمَز دربان تلسمه !!

آذربایجان

آذربایجان چوخ گؤزل

دنیزی وار،داغی وار

آغاجی وار،باری وار

آلماسی وار،باغی وار!

ساوالانی تای سیزدیر

بیردونیادیرسهندی

«شه هَر یئری» گؤرمه لی

جنّت کیمین دیرکندی !

 «گؤی مچچیدی» چوخ اعلا

گؤزل« بابک قالاسی»

ایستی سویو،ائل گؤلؤ

گره ک دئییم: قاداسی !

قوشاچایی ان گؤزل!

خیاوین وار ویقاری

سئویندیریر میللتی

خوی داشمسین مزاری

من گئتمیشم گؤرمیشم

قوتورسویو،شابیلی

دالغالانیب سئومیشم

اردبیل،شورابیلی !

چوخ زنگین دیر،دَیَرلی

ماکو گؤزَللیکلری

گؤزلو تفرّجگاهی

قوشلارون  جیک جیکلری !

باشکندین ایستی سویو،

سودره سی،آرازی

چنگیزخانین بولاغی

اردکی،جوجه،غازی!

قیش دَه بَتَر سویوق دور

اورمو هاواسی بوزدور!

یاردیم ائدین اوشاغلار

اورموگؤلو سوسوزدور!

دوچرخه لر شهرینه

گلین گئدَک بینابا!

یوخسول آداملارکیمین

حمله ائدَک کبابا !

بیزی اورداسسله ییر

آذربایجان آتاسی

اوجا سسله چاغیریر

بیزی قیزلار قالاسی !

مَرَندَه دوشدو یولوز

اونوتمایین زنوزو !

گؤزل گؤزل باغلاری

تویوغلاری،خوروزو !

اونوتمایین اوشاغلار

قوجا،گؤزل زنگانی!

داش کسَه نین معبدین

پیچاغلارین،هریانی !

گئدیب دیققتله گؤرؤن

کتله خورغارینی

ائل داغینین پارکینی

قدیمی بازارینی !

توکندی شعریم ،اولسون

سیزه داغلار دایاغلار!

من گئدیرم یوخلاییم

گؤله گؤله اوشاغلار

نهنگ

بو دونیا بیر دنیز کیمین،درین دیر

بیزلر کیچک بالیغلار

اجل نهنگ کیمین دیر