ال چَکمَز

ایرانلی آدام گوناه دان ال چَکمَز
اولماز آدام  ایشتباهدان ال چَکمَز
مین یول اؤلسَه،دیریلسَه اؤزگور یاشاماز
معتاددی،شیخ و شاه دان ال چَکمَز

قاراقیش

قاراقیش دیر،میللت اؤلور آجیندان
سوفره لَردَه تویوق،اَت دَن خبر یوخ
قار یئرینه زَهَر یاغیر فلک دَن
سو-چؤرَک دَن،بال-شربت دَن خبر یوخ

یاییلیب دیر جهالت ویروس کیمین
غارت ائدیر چین میللتی روس کیمین
سؤنوب چیراغین نورو فانوس کیمین
دوزگون لوک دَن،شرافت دَن خبر یوخ

انصاف کؤچوب،شرف چکلیب دارا
اینسانلیغین بدنی پاراپارا
اللر بوش دور،گؤزلر یاشلی،گون قارا
اینسانلیغدان،عدالت دَن خبر یوخ

یوخو

روحوم سولماز،سارالماز
غم کونلومدان باج آلماز
بیر گون یوخودان دوررام
گوزوم یولوندا قالماز
Ruhum solmaz,saralmaz
Qem kunlumdan bac almaz
Bir gün yoxudan durram
Gözüm yolunda qalmaz

شاعر

شاعیرین سؤزو اؤلَر
اؤره یی،گؤزو اولَر
یازسا اؤلدوره جک لَر
یازماسا اؤزو اؤلر
Şairin sözü ölər
Ürəyi,gözü ölər
Yazsa öldürəcəklər
Yazmasa özü ölər

سن گلدین

آغاجلارا بار گلدی
آلما گلدی،نار گلدی
بوزلایان اوره ییمَه
سن گلدین،باهار گلدی
Ağaclara bar gəldi
Alma geldi,nar gəldi
Buzlayan ürəyimə
Sən gəldin,bahar gəldi