باساباس

دوغدولار دولدو دونیا
سارالیب،سولدو دونیا!
نفس چکه بیلمه ییر!
باساباس اولدو دونیا!

اوغروکده

اینسانلاری آج گوزلو،یالانچی،دَله دیر

اوغرو کدَه،بیر خرابه،ایران بئله دیر

معلوم دئییل گونَش ،قارانلیق ...بیلیرم

بیرگون دوغاجاق بو مملکت حامله دیر !

شق شق شق

آج قالیب بس کی اوشاق ونگ ویریر وق وق وق !
آناسی باشینا کفگیری چالیر شق شق شق!

سوء تغذیّه توتوب بو قوجامان جامعه میز!
سسلنیر دیشلری هم قیچلاری هی لق لق لق!

چالما مظلوم آدامین بارماقوویلان قاپی سین
قاپیوی چالمیا تا چکّش ایلن تق تق تق!

او کی آللّاهیمیزا ذرّه جه ایمان یوخودور
خلق ایچینده هامی یئرده جیغیریر حق حق حق

نر گویرچین دئدی ویران یووا دا ماده سینه:
«سنی چوخ ایسته ییرم باور ائله بق بق بق

تشککور ائدیرم

باها لیق ائتدی منی لال، تشککور ائدیرم !
نه پولوم وار نه ده بیر مال تشککور ائدیرم !

«مش حسن» آروادینا جمعه یاتان واختدا دئدی:
«سَندن ای بال دوداقی بال ،تشککورائدیرم»!

دیشسیز آروادینی آلدی قوجاقا،تولکو کیشی
سؤیلَدی:«آی قوجا چاققال تشککور ائدیرم»!

اَرینه یازدی:«بیر اویناشلی قادین،یاندیر ما
منی اؤلدور، قویویا سال تشککورائدیرم»!

ئیرمی ایل درس اوخودون دکترا آلدین،سونرا
اولمیسان سنده قارا مال تشککورائدیرم !

گئتدی آمریکایا قزوینلی گلن واختا دئدی :
«دییه بیلمم آدین،از«دال»تشککور ائدیرم»!

«رمضان» گئتدی،داها گئچدی قارین سسلنمگ !
سندن ای «اوّلِ شوّال» تشککور ائدیرم !

«رجب جعفری زاویه» تا من دیریم !
سندن ای «شاعر خلخال» تشککور ائدیرم !

سن دوزلتدین هامی یانلیشلاریمی شعریمده
نوکرم من سنه،ساغ قال،تشککورائدیرم !

---

دوبیت زیرهم از مرحوم  استاد رجب  جعفری  زاویه :

قـارداشـیـم ،جعفریـم،عالم شعر ایچره سنی
بیـلـیـرم زیـروه ده قـارتـال،تـشـکـکـور ائـدیـرم !

شرح و بسطیله ده یؤخ ؛ بو ایکی بیتیله داداش
تـکـجـه با صوـرت اجـمـال،تـشـکـکـور ائـدیـرم !

آجین آندی

کیم دئییب، غمدن دولماز

سارالیب،اؤلوب،سولماز

سن توخسان،خبرین یوخ

آجین آندی آند اولماز

kim deiyb qəmdən dolmaz

saralıb,ölüb,solmaz. 

sən toxsan,xəbərin yox

acın andı and olmaz