ریشه دن

یاندیر ای«حاجی حسن» درد،اختلاسی ریشه دن 

یانماسا چوخ گؤزله« قانون اساسی»ریشه دن

وئرمَه سَن بیر آن آمان بو مملکت ده«بید» لره

داش اوره گ اول،سال آیاغ آلتیندا«ساسی»ریشه دن

قوی بیرآز راحت دولانسین آی کیشی ارکک – دیشی

سالما آمما کؤینگی،شورتو،لباسی ریشه دن

گر یئرینده من اولام خوار ائیله رم یالتاقلاری

بمبیلان محوائیله رم تئز التماسی ریشه دن

گؤزله سو قطع اولماسین ساحیلده،یانقین دریادا 

یانماسین بیر دفعه «غسل ارتماسی»ریشه دن

بو اِئوه اوغرو گلیب،دوت بوغ،بو تولکو اوغرونو

چون آپاردی خالچانی،یاسدیق،پلاسی ریشه دن

رعایت ائیله

کسب زر و سیم،سعادت ائیله

اوغرولوغو بی نهایت ائیله!

پول قووزا ولیک خلق ایچینده

هی اوغرولاری شماتت ائیله!

هی زرزر اوشاق قازانما جانیم!

بیر ثانیه استراحت ائیله!

بس دیر دای اوتان،جماعدان ال چک

گل گئت نمازین  جماعت ائیله!

قانون یازان ای موجّه اینسان

قانونو بیر آز رعایت ائیله!

آی آج آدام،آی بئلی بوکولموش!

اؤیرنجیلری هدایت ائیله!

گئت داغلارا آجلیغین الیندن

باش چال داشا هی شیکایت ائیله!

ائششک آدامی گؤرنده  تعظیم

عرض ادب و ارادت ائیله !

گؤجلو دئییل  آمما ای اوخوجو

بوشعری اوخو روایت ائیله !!

ایستگاه

ایران بیرایستگاه دیرا زَلد َن اونا

هی گلیرلر قاطارقاطار اوغرولار

ایشلری پول قووزاماق  دیر،اولوبلار

شعور سوزملته  سوار اوغرولار

اوغرولارین آدی گاهدان فرق ائدیر

بیریسی گؤزل دیر،بیریسی زای دیر

بیری«حاجی حسن»،بیر«مش باقر»

بیریسی چیرکین دیر،بیریسی آی دیر

آلدادیرلار خالقی  یالان  سؤزلرله

شیطان کیمین آزدیرلارمیللتی

هرنه سؤیله ییرلر کؤک دَن یالان دیر

یازدیغلاری،مراملاری ایرتی

اوغرولوق درسینی مدرسه لردَه

اویرَنیرلرفصیل فصیل  اوغرولار

آدیم آدیم  یازدیم گل،اوخو،اؤیرَن

ایران یانی:نسیل نسیل اوغرولار

گل قوجاغیما

یالنیزلیغی آت،گل قوجاغیما

بولودلارکیمین گل سراغیما

گئجه یاواشجا گل اتاغیما

عاشیغام سنه،بوراخمام سنی

باخما یادلارا،باخما دؤشمنه

قوی خراب اولوم،یاپیشیم سنه

ایستی بدنین باغیشلا منه

آپارگؤیلرَه،مست ائله منی

قوی چاخیر ایچیم دوداغلاریندان

الیندَن اؤپوم،آیاغلاریندان

اوددوتوم یانیم یاناغلاریندان

گؤزوندَن سیلیم دومانی،چَنی

بوتون دونیانی آباد ائیله رَم

باغلی ملتی آزادائیله رَم

آغلاراؤزلری لاپ شاد ائیله رَم

اؤرگین اولسا قلبیم مسکنی 

یوخسول اینسان بازارچادا

یوخسول اینسان بازارچادا

میوه لَرَه باخدی گئتدی !

میوَه قیمتی اؤد کیمین !

 اؤره گینی یاخدی گئتدی !

ایلدیریم تَک غملَر گَلدی

 وار؛یؤخونا شاخدی گئتدی

غصّه بوکولمیش بئلینه

 قیلینجینی تاخدی گئتدی

باهالیقدان قان آغلادی

 گؤز یاشلاری آخدی گئتدی