بو شهرده

وار آج گوز آدام،آج،دَلی،چیلپاق بو شَهَرده
بیر گون ییخیلار چون دولو چاتلاق بو شَهَرده

گؤی دَن آجی، پیس ،درد و بلادان سورا یاغمیر
دریا،گؤل اولور چؤل، قورو،دوزلاق بو شَهَرده

دولت ده توکور طالع ایله دام،باجالاردان
کول باش آدامین باشینا تورپاق بو شَهَرده

مسئوللاری اوغرو،باجی،قارداش الی ایری
کؤک دَن پوزولوب حؤرمت و اخلاق بو شَهَرده

بیر قورد سمیناردا دانیشدی دئدی : ملت !
امنیّت جانی یوخو اوغلاق بو شَهَرده

قوربان کسیلیب بَللی دی کی ذرّه جَه چاتماز
یوخسول آداما،کاسیبا،داششاق بو شَهَرده

آرواد-کیشی نین کارخاناسی باغلانا بیلمَز
تولید اولاجاق هئی دَلی،آخماق بو شَهَرده

حاجی قربان

حاجی قربان داششاق دردی توتوب،اؤلمَک حالینا دوشموشدو.کندلیلرینی ائوینه ییغیشدیریب،حلالیت آلماق ایسته دی .

مشه یعقوب دئدی : بیرگؤن یوکوم ائششگیمدن دوشموشدو،سن کئچیردین، دئدیم : گل کؤمَک ائیله. داششاغینا سایمادین،کئچدین.
یوکومو تک باشینا قوزادیم، داششاغیم پارتلادی.او گؤن سنی بَتَر قارغیش ائیله ییب ،دئدیم : بارالها بونا بیر داششاق دردی وئر کی امانینی قیرسین...آمما ایندی سَنی باغیشلادیم.

دَلی حسن دئدی: بیرگؤن کدخدا ایله سو اوستونده ساواشیردیم،سَن منیم طایفام ایدین دئدیم گل کؤمَک چیخ.داششاق سیزلیغدان قورخوب ،بیر آی گیزلندین،او گؤن آللاهدان ایسته دیم کی سنین کیمین داششاق سیز آدامی یئر یوزوندن گوتورسون...آمما ایندی سَنی باغیشلادیم.

حسین تویوق دئدی : من آمما سَنی هئچ باغیشلامام .بیر گون توی مجلسینده سَنه گؤلدوم،قاییدیب خالق ایچینده اوجاق سَسله مَنه دئدین :  داششاق ! کؤپگ اوغلو !
او گؤندن هر کیم منی کوچه ده گؤردو مَنه داششاق دئدی ،دی یَه سَن آدیمی داششاق قویوبلار..یا تانری مَنی داششاق یارادیب...او گؤندن لاپ اؤزومو ایتیرمیشم