حاجی رجب

«حاجی رجب» ثروتین دریاسی دیر !
شهریمیزین اَن بویوک شوراسی دیر !
شورا اولماق اونون تمناسی دیر !
ناماز قیلماز،گونده گئدر نامازا !

چؤ دوشوبدور ریانی ترک ائدیبدیر !
شهرداریلان اروپایا گئدیبدیر !
بودوره بئش یوز میلیون وئریبدیر!
بیر هفته لیگ توتوبدور بیر مغازا !

تبلیغ ائدیر دووارلاردا اؤزونو 
قازئت لرده یازیب یالان سؤزونو

چیخاردیرلار رقیب لری گؤزونو
دئیرلر : رای وئرمه یین حقه بازا !

ائشیدمیشم دئییبدیر : آی جماعت !
ایسته ییرم سیزدَن ائدیم حمایت 
هی ائدیرم رقیبلن رقابت 
خدمت ائدیم سیزلره تازا تازا !

یالان دئییر هئچ کیمسه دَن اوتانمیر 
یالان دئمیر ،دگیرمانی دولانمیر 
قارقیشلانیب آمما نیه اوزانمیر ؟!
موفته خیارلاری سوخور بوغازا !!

دئییرکی : من اوزالدارام بوی لاری !
قیز - اوغلانا چوخالدارام توی لاری !
قورخمایین اصلاح ائدرم سوی لاری !
دوندَرَرَم تولکی،چاققالی غازا !!

سن سیز

بیر اتک گول دَرمیشه م
دریب یئله وئرمیشه م
سن سیز یاش حسرتیمى
گؤزلریمه سَرمیشه 

قزوینیم

قزوینیم،آی قزوینیم!

سن جیگریم،سن دینینم !

آیاق داشین مَثل دیر!

پسته لرین گؤزل دیر !

ایستکلی دیرباغلارین

ویقارلی دیرداغلارین !

نان ِ برنجین اعلا

کوچه لرین آوروپا !

باقلوانین شهری سن!

دهخدانین شهری سن!

عُبید سَن دَه یاشاییب

سَنی چوخ آلقیشلاییب !

وَطنَه دلدادَه دیر

عارفین آزادَه دیر!

اؤزؤمؤن وار،شرابین

دؤنیا :دَلی،خرابین!

شازدَه حسین سَراسی

اؤرَکلرین ماواسی !

سئویندیریرآدامی

قَجَرلرین حامامی !

سبزَه میداندا بوتون

پاریلداییر چلستون !

گئتمَمیشَم بیرایل دیر

مَغلواکین قیزیل دیر !

مست اولوب باخماز جاما

خیّام گلسَه خیّاما !

دَیَروئریبدیر سَنَه

گؤزَل سَعدالسّلطنَه !

دربکوشکون قدیمی

آداملارین صمیمی !

سئودیم شهرآراسینی

تهران دروازاسینی !

مولوی،هریانینی

سپه خیابانینی !

تاکستانی،الوندی

ضیاآباد،تاکندی !

قزوین، ای عشق دایاغی!

عاشیغلارین اوجاغی،

ای دونیانین باهاری !

قوناغلارین دیاری!

اومورام ساغ قالاسان

لاپ ایستی،داغ قالاسان !

یالان دیر دکتراسی

ساوادسیزدی،ولی وار ادّعاسی          

  یالان دیر دکتراسی

بیلیر بو نکته نی اؤغلو،آناسی                    

 یالان دیر دکتراسی

اونو تعریف ائدیر آلچاق آداملار         

 دلی – دیوانه،خاملار 
زهیر دیر شربتی،آب بقاسی         

  یالان دیر دکتراسی 

یازوبدور اوردا ،بوردا بش مقاله                  

اولوبدور استحاله 
« فُرویدون» اوغلودور،چوخدور باهاسی      

یالان دیر دکتراسی 

ادب دونیاسینا بیگانه دیر او             

دئمه فرزانه دیر او
غزل یازسؤن دئییر شعرحماسی

  یالان دیر دکتراسی 

اگرچه چوخ پیس اخلاقی سَرین دیر 

باخیشلاری درین دیر
هم اؤز یانیندا استاددیر اساسی 

یالان دیر دکتراسی 

سئور،سؤزلر ایچینده اؤز سؤزونو 

هی آلقیشلار اؤزونو

یالانچی دکترین اولماز شفاسی         

یالان دیر دکتراسی 

یازیق دکتر فقط یانلیش دالیندا    

 بئکار دیر ایش دالیندا 
گؤزو دار اینسانین یوخدور صفاسی   

یالان دیر دکتراسی 

بوراخ بس دیر «کل اوغلان» چوخ دانیشما

دئمَه هجوی،چالیمشا 

چیخارتما لطفاً اگنیندَن لباسی  

یالان دیر دکتراسی                                        

یالان

آغ ائششک ده پالان وار !

پالانینی آلان وار !
آغ ساققالین دیلینده
قالاق قالاق یالان وار  !